Papa Françesku, kreu i Kishës Katolike Romake, ka ndërruar jetë më 21 prill 2025, në moshën 88-vjeçare.

Papa kishte qenë i shtruar në spital që nga shkurti i vitit 2025 për shkak të një infeksioni respirator që u zhvillua në një pneumoni të dyfishtë.

Vdekja e Papës Françesku ka shkaktuar një reagim të gjerë ndërkombëtar.

Liderë të ndryshëm botërorë kanë shprehur ngushëllime dhe kanë nderuar trashëgiminë e tij, duke theksuar angazhimin e tij për drejtësi sociale, dialog ndërfetar dhe mbrojtjen e të varfërve.

Si zgjedhjet Papa i ri?

Përzgjedhja e Papës së ri bëhet përmes një procesi të quajtur Konklava. Kjo është një procedurë shumë e rregulluar dhe e mbushur me simbolikë dhe traditë.

1. Vdekja e Papës
Trupi i Papës vendoset në Bazilikën e Shën Pjetrit për homazhe publike.

Kardinali Kamerlengo (Camarlengo), i cili është përgjegjës për administrimin e Kishës gjatë vakancës së Selisë së Shenjtë, zyrtarizon vdekjen dhe nis përgatitjet për konklavën.

2. Thirrja e Konklavës
Brenda 15-20 ditëve nga vdekja e Papës, të gjithë kardinalët nën moshën 80 vjeç mblidhen në Vatikan për të zgjedhur Papën e ri.

Numri i kardinalëve votues zakonisht është rreth 120, por nuk mund të kalojë këtë numër.

3. Konklava
Kardinalët mbyllen brenda Kapelës Sistine, dhe askush nuk lejohet të komunikojë me botën e jashtme deri në zgjedhjen e Papës së ri.

Betohen për ruajtjen e sekretit absolut.

4. Procesi i Votimit
Çdo ditë bëhen deri në katër raunde votimi: dy në mëngjes dhe dy në pasdite.

Për t’u zgjedhur Papë, një kandidat duhet të marrë 2/3 e votave.

Pas çdo votimi, fletët e votimit digjen dhe tymi del nga oxhaku i Kapelës Sistine:

Tym i zi (fumata nera) = nuk është zgjedhur Papa.

Tym i bardhë (fumata bianca) = është zgjedhur Papa i ri.

5. Shpallja e Papës së Ri
Pas pranimit të zgjedhjes nga kandidati (i cili mund të zgjedhë një emër të ri papnor), bëhet shpallja publike:

Kardinali më i lartë del në ballkonin e Bazilikës së Shën Pjetrit dhe thotë:
“Habemus Papam!” (Kemi një Papë!)

Papa i ri del dhe jep bekimin e tij të parë: “Urbi et Orbi” (Qytetit dhe Botës)./Arbresh.info